Uncategorized

分享錄音經歷時，經常有人問：「你會唔會再去返一個已經錄過音嘅地方再錄音？」，多數我嘅答案都會係「全香港仲有好多地方我未去過，應該會主力填滿個聲音地圖先」，但其實心底裏機場係一直想想再訪嘅地方。今次錄音過程少咗一份心痛，多咗一啲慨嘆。 香港國際機場1號客運大樓C行－兩年後再返到嚟，已經唔再得通風口嘅排氣聲同零星嘅行李包裝聲 兩年前喺呢度分享過嘅「機場中的聚與散」，描繪當時疫情下機場中人離開香港嘅情景，以及記錄咗一種奇特嘅冷清同寂寞。2024年，我再次來到機場，企喺同樣嘅位置，但耳邊嘅聲音已完全唔同；登機大堂由單調嘅通風口排氣聲同零星行李打包聲，變成四處係遊客嘅喧囂交談聲、行李箱與手推車嘅滾動聲。今次我亦特意去咗上次未去嘅接機大堂，記錄無間斷嘅國際航班到達，形成一個充滿多元語言嘅場景，反而好似聽唔到廣東話嘅存在。機場內嘅氣氛同之前相比，變得更加複雜，不單是疫情後日常生活嘅復甦，更成為見證社會變遷嘅舞台。 做Field Recording，我哋經常會提到要係身邊環境「消失」前做記錄。呢種「消失」唔一定係指一棟建築物拆咗，或者某啲事物不復存在；更多嘅時候「消失」可以係指時間嘅推進，令一啲人同事嘅景象唔再出現。有時我都會懷念前兩年疫情時街道靜謐嘅狀態，四周圍幾乎冇人；當時嘅空氣中透著一陣寧靜，同而家邊度都迫滿人、搞到人透唔到氣嘅狀況天差地遠，但隨著時代變遷，呢種平靜嘅日子未必能夠再遇見得到（雖然有啲人可能唔會想再次經歷）。

最近因工作需要我身處石硤尾一帶，有一次過馬路時喺南昌街同窩仔街嘅交界處，發現平日聽慣嘅紅綠燈聲變得有啲奇怪硬係有啲唔對路。原來係因為運輸署而家試用緊新一代嘅電子行人過路發聲裝置，呢個新裝置嘅聲音聽落去好似低質素、係街邊買嘅喇叭咁。 直到十月中旬，同AK＠AK IN KK 遊覽大角咀嘅時候諗起呢件事，就上運輸署嘅網站搵資料，發現佢哋而家呢款「新一代電子行人過路發聲裝置」，係下面文件列出地點測試緊，而當日行經嘅大角咀海泓道／富榮花園中間條馬路，就係用緊新款嘅Prisma Daps。https://www.td.gov.hk/filemanager/en/content_4959/Locations_of_New_eATS.pdf我地觀察呢個過路處，發現新款嘅發聲喇叭體積比我哋見慣嘅舊款RTB Kombi III-S 細好多。當日AK帶咗錄音機出嚟，決定要錄低兩個發聲裝置嘅聲音，比較下佢哋聽覺嘅分別。 大角咀海泓道／富榮花園過路處 錄音： 舊款 RTB Kombi III-S 新款 Prisma Daps ES-401 聽完呢兩條錄音之後，你哋覺唔覺得舊款聲音好清楚，而新款聲音就有啲模糊嘅感覺？ 錄音入面好明顯可以聽到Prisma Daps 發出嘅聲音比RTB Kombi III-S 暗啞好多，就好似用緊隻電話喇叭聽歌咁。舊款Kombi嘅聲音包括高、中、低音全部都有，每一下聲響都能夠觸發聽覺，係遠處聽都有足夠分析度，令到行人容易察覺訊號；但新款Prisma Daps 就冇呢啲特點，只係有中音部分突出，能夠吸引注意力嘅高音部分消失唔見，整個訊號聲同附近嘅環境噪音融合埋一齊，包括經過嘅車輛聲音同路人噪音。咁嘅特質會唔會令到需要過馬路嘅行人警覺性減低？或者對於需要依靠聲音嘅人感到迷失？聽落好似講得有啲誇張，但其實可以借呢個機會諗下聽覺對於我哋日常生活有幾多嘅幫助。 翻查舊資料，而家用緊嘅RTB Kombi III-S 係係2003年更換，當年更換原因正正係令視障人士聽到行人過路交通燈嘅顏色顯示狀況。有一點比較有趣係時任運輸署高級工程師李智超提到：「這電子過路裝置不僅能根據附近環境的噪音水平自動調節發聲量，還可以給視障人士提供觸覺訊息。由於把大部分聲音向馬路發放，故能二十四小時運作，而不會對附近居民造成過量噪音滋擾。」經過20年嘅使用呢款裝置已經深入民心，唔係一時三刻就可以改變到嘅習慣。https://www.info.gov.hk/gia/general/200304/24/0424201.htm 咁你會話：「其實都唔係好大分別啫，咪都係個隻聲嘟嘟嘟嘟咁」都係嘅，呢種咁細微嘅轉變未必人人咁在意，但我哋身邊嘅環境好多時就係不斷有呢啲咁細微嘅嘢變下變下就成個地方唔同晒樣；又例如紅綠燈嘅鄰居安全島燈箱，本來係四方柱體自己識發光，而家慢慢變晒做一塊反光牌。係到自認係衰仔先，有時候我都係係條街一路行一路撳電話，要過馬路就係聽到佢轉聲先望返真係轉咗綠燈（記得唔好過緊馬路都淨係望住個mon），所以即使係咁細微嘅轉變都對自己嘅日常生活觀感造成幾大嘅落差。 係寫緊呢篇雜記嘅時候我去咗英國旅行，當然會遇見返香港道路系統同交通燈嘅起源。英國交通燈同行人過路燈有一種相識而陌生嘅感覺，香港人去到絕對可以會識得點過馬路，但聽覺上英國就係完全缺少呢篇文章一直討論緊嘅聲音部分。大部份路口，無論紅燈定係綠燈都係無聲音提示，要完全靠對眼去睇燈（雖然冇乜人真係跟個燈號嚟過馬路，見到無車就行），只有少部分路口係轉綠燈個一下先響幾聲。呢一種無聲音提示嘅狀態，對於視障人士嚟講係好唔方便同容易造成危險。 要嘗試理解同香港根本性嘅設計概念分歧，可以搵到英國本地嘅解釋：當幾個過路處太接近，佢哋嘅紅綠燈就唔會發出聲響，避免行人混淆來自一個過路處嘅聲音誤認為嚟自另一個過路處，而視障人士只能夠靠WAIT制箱下面嘅觸感提示知道燈號。換句話講，視障人士其實會行行下轉咗紅燈都唔知。https://www.mylondon.news/lifestyle/travel/you-never-hear-beeping-sound-19857176 雖然Prisma Daps 裝置已經喺特定地區試用緊，但係運輸署應該要進行全面測試同埋收集行人嘅意見，特別係視障人士或者其他殘疾人士，確保呢啲裝置係有效同埋安全。透過進一步嘅測試同埋評估，運輸署可以評估新款裝置係唔同交通量、周圍噪音同埋地理環境下嘅適用性，先決定係咪全面取代現有嘅RTB Kombi III-S 系統。 更多閱讀：https://zh.wikipedia.org/zh-hk/%E4%BA%A4%E9%80%9A%E8%99%9F%E8%AA%8C交通信號 － Wikipedia 舊款行人過路發聲裝置RTB Kombi III-S 230V Product Informationhttps://www.rtb-bl.de/wp-content/uploads/RTB_acoustic_units.pdf 新一代電子行人過路發聲裝置Prismatibro – Prisma Daps ES-401https://www.prismatibro.se/dl/da/image_high/Prisma-Daps-ES-401_2191x1968_201020-01.jpgProduct

The essential component of the field recording process is the microphone. The choice of the recording equipment will inevitably affect the outcome of the recorded audio and ultimately listener’s perception of the soundscape environment.

環境錄音過程中其中一個最重要元素係咪高峰，而錄音設備嘅選擇將無可避免地影響錄音結果，最終影響聽眾對聲音環境嘅感知。今次資料搜集／對比旨在通過觀察音質、Stereo Image、空間感／包圍感，比較幾種常見嘅立體聲錄音技術。

過去兩年疫情爆發，香港對唔同國家都相繼封關發出航班禁令，令到機場飛機升降量大跌，以往逼爆嘅客運大樓都慢慢人去樓空變得冷清。移民潮嘅湧現，會去到機場乘搭每日餘下一兩班前往歐洲嘅航班，都係選擇離開呢片土地嘅人。亦都因為呢個特別原因，我選擇拎住錄音機，去記錄疫情下機場嘅聚與散。 呢一次嘅錄音，係一個心痛嘅過程。 近一兩年，「離開」成為咗每個香港人嘅關鍵詞，「會唔會走？」「諗住去邊？」「搵咗地方落腳未？」等等逐漸變成自身對未來唯一嘅質問，對於留下充滿恐懼與不安，昔日充滿歡樂嘅機場亦變成一個別離嘅場所。係能夠選擇嘅情況下，人唔會希望離開自己嘅親人、離開自己最熟悉嘅地方。 離開嘅人一句「多謝你哋嚟送機」同親友道別，送別嘅人一句「保重」，每一個字都係非常沉重。即使作為旁觀者，係錄音觀察過程中，我亦都難掩傷感情緒湧出眼淚。「ByeBye」聲此起彼落，留連不捨嘅空氣蔓延整個離港閘口，每個人都珍惜別離前嘅每一秒時光。 此心安處是吾鄉，祝願前往尋找新家園嘅人一帆風順，平安快樂。

Recording: Recording: Processing Used: AMBEO A-B Converter (for Saramonic SR-VRMIC) All recordings are decoded into Stereo with Soundfield by Rode A low shelf filter is applied to all recordings