重喺香港演藝學院讀緊書嘅時候我上咗一科，學習用製作PC Game 作為藝術表達嘅方法，而其中一份功課嘅要求係唔可以做一隻係傳統電子遊戲玩法嘅作品，題材不限。個一刻嘅我仍然係好熱愛Field Recording 嘅人，好想利用聲音景觀作為功課嘅主題，但諗咗好耐都未諗得到應該點做。直到有一晚瞓覺，夢見到係一個展覽空間 入面有張枱上面有啲積木，只要我郁動啲積木，唔同聲音原素就會跟住係個空間移動，當刻係個夢入面已經知道我要做一個現實版。
係過往對外做環境錄音工作坊嘅時間，我好經常提到環境聲音無得控制，人、車、物件發出嘅聲音就係製造緊佢地當刻嘅無意識結合，亦都係最客觀嘅一種觀察，係世界對你作出最真實嘅呈現。但如果我自己推翻呢套理論會係點；我係幾時開始有呢種改變不可控嘅諗法？係咪代表住我自己都唔想接受個世界真實嘅一面？個夢又係咪其實潛意識比我嘅提示？
呢一份功課係用Unity 寫，當時已經好想將佢放到落Spatial Audio 系統到玩，但可惜Unity 對聲音支援不足同埋時間限制，最後只能夠做咗個用Headphone 玩嘅Proof of Concept；亦都係咁呢個構思一直係個腦入面存在，希望有一日可以做到個完整版出嚟。
<迴響與幻象>係一個纏擾咗我思想接近兩年嘅想法。
本身個裝置/展覽寫喺計劃書嘅名係叫<聲響像成>，名字由來於我喺APA畢業作品<聲響憶城>（2023），作為我創作聲音裝置藝術嘅延伸/續集，而個名亦好簡單地表達咗有聲音就有畫面出現。最後無用呢個名係覺得佢唔能夠載得住成件事嘅概念，另一放面係我想脫離被之前作品延伸出嚟嘅框架。
成個裝置展覽分四部分：
第一部分Track 1 “感知的邊界”，剛入到嚟嘅觀眾可以係一個相對安靜嘅空間隔住玻璃，用Headphone 聽到係展覽場地外面錄音機即時接收到嘅聲音；本身個構想係比一部錄音機觀眾可以拎出去牛棚範圍體驗錄音，但呢個做法多多部錄音機都唔夠做，比人偷晒啲機都未天光。意料外好多觀眾對呢一部分都覺得好有興趣，亦都達成到我哋設計比人打開耳仔嘅功能。
第二部份Track 2 “靜謐與喧嘩”，呢部分比較簡單，用四隻Headphone 循環播放8條錄音，當中有7條係喺WAVINCITY 揀出嚟，最後一條就係特登去咗Donki 錄（當時搵咗個位係天花喇叭Donki歌同雪櫃蟹歌之間嘅位置，超級嘈，錄緊重有職員走嚟問我量度緊啲咩）。比較多人唔太理解呢部分編排嘅用意，其實當中有我自己對於咩係靜咩係嘈嘅答案；靜/嘈唔單止代表音量，佢更係表達緊一種心理壓力、表達緊我哋可以自由選擇嘅狀態。
第三部份Track 3 “無形的知覺”就係今次嘅主角。上面提到Unity 做唔到想要嘅功能，所以今次就用咗Unreal 去做觀眾嘅控制介面，係開發嘅過程我要一路學一路試，去到臨入台一刻都係繼續debug緊。另外Touch Designer、QLab、Reaper，幾個software 都係唔正常用法，要爆發前IT狗技能嚟Program 成件事。展覽過程中見到好多觀眾唔同嘅玩法，有真心砌聲聽半個鐘、有係咁捹Sound Object 玩Spatial Audio 效果、亦都有人聽Soundscape 聽到瞓著覺。
觀眾每撳一下枱面嘅黑色制，會觸發嘅聲音都係隨機，伴隨住根據當下聲音元素即時生成嘅畫面；聲景唔再只係現實環境嘅附屬品，佢變成係控制世界嘅方法，變成一種可見嘅經歷。即使啲聲音元素只係預設好二三十條Sound Cue，每個組合都係靠觀眾主觀產生，佢哋成位咗當下嘅記錄者。
第四部分Bonus Track “共鳴相遇”。由來係參考一隻專輯嘅做法，當有一隻唔太fit in 嘅歌都想放落隻碟就會以Bonus Track 放係Tracklist 最尾，唔聽都唔會影響專輯嘅原整性。呢部分某程度係將我自己都變成一件展品，用帶有少少真人圖書館嘅做法，分享我呢幾年作為環境錄音師嘅諗法比有緣份坐低嘅觀眾。叫一個好唔鍾意講野嘅人係呢部分坐係到主動聊人傾偈，完全係突破自我嘅行為（兩個星期傾咗一年份量嘅陌生人偈）；過程中我會問人問題，亦都比人問我問題，希望係中間搵到對聲音、對我點解做錄音、做聲景藝術嘅解答。
現場整聲景黑膠呢個諗法係之前做大角嘴Project 時產生，如果聲音唔需要再經過Analog 轉Digital 記錄再轉Analog 接收，而係直接Analog -> Analog，同時每一隻碟都係獨一無二當刻嘅記錄。呢個諗法擺低咗好耐，去到呢次展覽可以拎返出嚟，放大作為貫穿成件事嘅概念，同時亦都參照緊我自己收藏黑膠呢個興趣，所以先出現Track1, 2, 3, Bonus Track 嘅做法。雖然最後只係用現存錄音去揀一條刻落膠碟，但每隻碟都係一Take 過，中間有咩失誤、失真，都會成為聲音一部分保存係坑紋入面。
我以環境錄音師活動咗5年，錄音當刻我可以以一個能夠對「現實」尊重嘅態度面對世界，但跳返去錄音以外嘅時間，我對香港產生咗強烈嘅聽覺疲勞；疲勞唔係來自聲音本身，而係我無辦法選擇唔聽被強迫接收嘅資訊。聆聽唔再係理解世界嘅方法，而係變成咗一種負擔。作品入面最中心嘅疑問：”到底我其實鍾唔鍾意聲音？”，來自我對呢兩個狀態嘅矛盾。呢刻我身處異鄉，再次得到選擇權，個疑問亦都逐漸消失。
<迴響與幻象> 係咪一個我創造比自己嘅療癒裝置？療癒唔係為咗令我聽少啲聲，而係令我再一次肯去聽，聲音從來冇變，只係我學識得點樣面對佢。
－王梓健 寫於2025年11月
—————————————————————————————————
《回響與幻象》
王梓健聲景裝置作品
在聲音超載的世界，還聽到甚麼？
聲音藝術家王梓健自2021年起開始搜集香港城市聲音，走遍各處聆聽，設置錄音機採集、後製、撰寫文字紀錄、上載 — 系統化及數據化的記錄聲音並製成聲音地圖及存庫。四年過去，王梓健察覺自身對城市嘈雜的不適感俱增、街道、聲音的混亂，每日受到過量的聽覺資訊轟炸，內在與作為環境錄音師的身份開始產生矛盾。
是次聲景裝置作品將以過往搜集的環境錄音選段、空間音效系統(Spatial Audio System)、虛擬城市聲音與即時生成影像的並置及藝術家的現場交流組成，以時間沉澱聽覺，提供一個場域重新詮釋城市聲音，展示內心矛盾的深刻反思，建構一個聲音烏托邦，共同體驗並思考在喧囂中尋求寧靜的可能性。
地點：1a空間 (香港九龍土瓜灣馬頭角道63號牛棚藝術村14號室)
展覽日期： 12 – 26／1／2025
藝術家 Artist：王梓健 Peter Wong Tsz Kin @peterwongtszkin
策劃及製作 Curated and produced by：WAVINCITY – 香港城巿聲音紀錄計劃 Hong Kong Urban Soundscape Recording Project
視覺設計 Visual Design：劉婉婷 Belle Lao @laounteng
空間設計 Spatial Design：劉婉婷 Belle Lao，張鎧淇 Cheung Hoi Ki Gloria @gikioh.pausefor
空間助理 Spatial Assistant：陳家朗 Chan Ka Long Jeffrey ，黎偉鯤 Lai Wai Kwan
燈光設計 Lighting Design：李定達 Le Dinh Dat @dat.theory
燈光助理 Lighting Assistant：麥潁然 Mak Wing Yin，黃志軒 Wong Chi Hin，黎清 Lai Ching
音響助理 Audio Assistant：李嘉城 Li Ka Shing @_kyi7le
錄像協作 Video collaborator：陳家濠 Gary Chan @gary_tenboy11
攝影及拍攝紀錄 Photo and Video Documentation：許康年 hongnin. @huihongnin
監製 Producer：王禧彤 Becky Keung Wong @beckykeungwong
協助 Collaborated by：1a空間 1a space @1a_space