過去兩年疫情爆發，香港對唔同國家都相繼封關發出航班禁令，令到機場飛機升降量大跌，以往逼爆嘅客運大樓都慢慢人去樓空變得冷清。移民潮嘅湧現，會去到機場乘搭每日餘下一兩班前往歐洲嘅航班，都係選擇離開呢片土地嘅人。亦都因為呢個特別原因，我選擇拎住錄音機，去記錄疫情下機場嘅聚與散。
呢一次嘅錄音，係一個心痛嘅過程。
近一兩年，「離開」成為咗每個香港人嘅關鍵詞，「會唔會走？」「諗住去邊？」「搵咗地方落腳未？」等等逐漸變成自身對未來唯一嘅質問，對於留下充滿恐懼與不安，昔日充滿歡樂嘅機場亦變成一個別離嘅場所。係能夠選擇嘅情況下，人唔會希望離開自己嘅親人、離開自己最熟悉嘅地方。
離開嘅人一句「多謝你哋嚟送機」同親友道別，送別嘅人一句「保重」，每一個字都係非常沉重。即使作為旁觀者，係錄音觀察過程中，我亦都難掩傷感情緒湧出眼淚。「ByeBye」聲此起彼落，留連不捨嘅空氣蔓延整個離港閘口，每個人都珍惜別離前嘅每一秒時光。
此心安處是吾鄉，祝願前往尋找新家園嘅人一帆風順，平安快樂。