環境錄音過程中其中一個最重要元素係咪高峰，而錄音設備嘅選擇將無可避免地影響錄音結果，最終影響聽眾對聲音環境嘅感知。今次資料搜集／對比旨在通過觀察音質、Stereo Image、空間感／包圍感，比較幾種常見嘅立體聲錄音技術。收集所需嘅聲音數據嘅過程會分為兩部分；第一部分首先選擇器材，包括錄音機同咪高峰，並決定位置收集錄音；第二部分則通過比較音色差異，分析唔同錄音嘅特點。
器材
係環境錄音社群當中有幾種咪高峰指向性好受歡迎，包括Omni(無指向性)、Cardioid(心形指向)、XY同Ambisonics。而係第一步首先決定用邊一款咪高峰代表唔同指向性。
－XY
XY 指向嘅咪高峰好常見出現係唔同手提式錄音機，包括最受歡迎嘅型號例如Zoom H5、Sony PCM-D100、同Tascam 最新推出嘅Portacapture X8。X8 係市場上最先出現提供內置咪高峰嘅32bit 手提錄音機，佢低Noise Floor(底噪) 同錄音方便性令佢成為今次XY 指向性嘅代表。
－Omni
Omni 指向性係環境錄音師最鐘意嘅選擇之一，佢可以製造出近似於真實世界嘅通透同開揚嘅聲音。LOM Uši Pro 以極低底噪同極高靈敏度成為咗環境錄音界中最搶手嘅選擇，每次開賣都會5分鐘內沽清存貨。但買唔到Uši Pro 都唔使擔心，因為市面有好多獨立製造商所生產嘅咪高峰，包括Micbooster 嘅Clippy EM272 都採用相同嘅Primo EM272 駐極體電容振膜，提供同樣嘅錄音性能同時非常容易購買。Clippy EM272 係今次代表Omni 指向性嘅咪高峰。
－Cardioid
心形指向對係音樂錄音最受歡迎同最基本嘅選擇，但講到環境錄音就未必係每個人最優先嘅選擇。唔同嘅立體聲擺放技巧，例如NOS、ORTF、DIN，都會影響錄音成果；當中NOS 兩個相距 30 厘米並相互成 90 度角嘅擺放方法能夠製造出真實嘅立體聲效果，Stereo Image嘅闊度介乎XY 與Omni 之間，令佢成為今次實驗嘅對象。
至於咪高峰嘅選擇，Haun(MBHO) 並唔係一個家傳戶曉嘅牌子，但佢以蔗渣價錢有燒錢味道受人讚揚，聲音質素比得上一支五位數價錢嘅同類型產品，亦因如此今次會用Haun MBC660 代表Cardioid 對。
－Ambisonics
有別於傳統單向咪高峰，被稱為Ambisonics 嘅球形環繞聲格式額外包括咗聆聽者上下方嘅聲源，隨住電腦運算能力不斷提升同後期處理嘅靈活度，聲音工程師同音樂人對Ambisonics 越嚟越感興趣。然而Ambisonics 器材普遍高昂嘅售價亦會令人卻步，例如Rode 推出嘅NT-SF1，價格高達 1000 美元，同時需要一部 4 channel 嘅錄音機，入門難道非常高。最平易近人嘅解決方案係Zoom 推出嘅H3-VR 錄音機，內置1st Order Ambisonic 咪高峰，其易用性同低廉嘅價格使其成為最受歡迎嘅Ambisonics 錄音設備。 其缺點係Noise Floor 偏高，增益設定亦唔夠彈性，好容易係高噪音環境下爆咪，儘管如此佢只係200美金嘅售價使其成為今次對比中最合適嘅Ambisonics 設備。
（Ambix B Format 錄音會轉換成兩條立體聲錄音，分別模擬Omni 與Cardioid 咪高峰作對比）
地點
要深入測試唔同咪高峰嘅差異，好需要一個聲音豐富多變嘅地方；如果城市中搵到一個角落包括多種交通工具、大量人為製造聲音就可以滿足呢個需求。今次測試嘅地點係位於天水圍北面，俊宏軒屋苑外嘅一個十字路口，呢個位置有輕鐵、路面交通交匯，同時有蔬果攤檔同行人過路設施，產生咗一個非常豐富嘅聲景，亦因此成為錄音採樣嘅最佳位置。
（GPS位置：22.468895、114.000079）
設置
為咗減少因為距離而造成嘅誤差，錄音機同咪高峰都安裝係同一個三腳架上，近距離而唔干擾彼此下面向同一個方向。
－Omni 咪高峰之間相距30cm。
－Cardioid 咪高峰以NOS 擺放（間距 30 厘米，角度為 90°）。
－X8 和H3-VR 分別內置嘅XY 與Ambisonics 咪高峰直接錄製到錄音機中。
－Micbooster Clippy EM272 與Haun MBC660 均連接到 Tascam Portacapture X8 外部XLR 輸入。
－Tascam Portacapture X8 以 WAV 32bit/96kHz 格式錄製所有音軌。
－Zoom H3-VR 以 WAV 24bit/96kHz 格式錄製。
後期處理
錄音於2022年8月進行，四條15分鐘嘅聲音同時錄製。
錄音其後係Avid Pro Tools 後期製作，每條聲音都以相同Plugin 處理，最後均調整音量至-28LUFS 範圍。
－EQ：120Hz 放置Low Shelf 減低過多嘅低音
－Limiter：臨界-0.5dB 防止Clipping
－檔案輸出架式為WAV 24bit/96kHz
所有錄音均無刪減或修改
僅限 H3-VR
－Ambix B-Format 使用 RØDE Soundfield Plugin 轉換為立體聲
錄音
Tascam Portacapture X8 – XY
Micbooster Clippy EM272 – Omni
Haun MBC600 – Cardioid
Zoom H3-VR – Ambisonics convert to Omni
Zoom H3-VR – Ambisonics convert to Cardioid
比較與討論
錄音將會以聲音質素、Stereo Image、空間感／包圍感作比較
音質
－XY
X8 內置嘅XY 咪高峰嘅Frequency Response 係五個例子中最為暗淡，係5kHz-10kHz 區域缺乏清晰度，對一個開放空間嘅還原度略嫌不足。有啲元素例如經過嘅汽車或輕鐵，聲音有好多低音積聚，聽起上嚟比較混濁，有一種類似室內錄音嘅感覺。
－Omni
Clippy EM272 嘅聲音係五條錄音之中最為清脆，同X8 XY咪高峰相反，佢係5kHz-10kHz範圍非常豐富，令某啲元素例如紅綠燈，從中受益並成為主導聲音。係錄音06:39，可以聽到紅綠燈聲係位於輕鐵聲之上，而XY 錄音就會發現紅綠燈聲被輕鐵聲掩蓋。
－Cardioid
Haun MBC660擁有五個例子中最平衡嘅音色，Frequency Response 唔會過份暗淡或者銳利，準確地還原現實嘅聲音，係錄音13:10 可以聽到附近嘅人聲非常自然，亦較少出現上述XY 或Omni 有元素被掩蓋嘅情況發生。
－Ambisonics (轉換為立體聲)
係Ambisonics 轉換出嚟嘅兩個虛擬咪高峰版本係10kHz 範圍都非常銳利，尤其係Omni 版本，呢種特性會令聆聽者係長時間嘅聆聽中感到煩厭並產生聽覺疲勞。係錄音4:00，單車煞車嘅高頻聲音被咪高峰過份放大，聲音非常刺耳。
Stereo Image與包圍感
－XY
XY 設置係所有錄音中具有最窄、最平坦嘅Stereo Image，環境包圍感非常弱。錄音聽起嚟好似一條單聲道錄音，但同時左右聲道之間存在大量分離，內容可能只會存在係其中一側，與另一聲道無任何連貫性；聆聽者可能唔能夠感受到環境嘅深度同空間感。
－Omni
Omni 設置有最好嘅包圍感，能夠係一個普通立體聲播放系統上還原現實三維嘅感覺。然而因為先天因素兩支Omni 咪高峰會接收到相似嘅內容，令聲音嘅方位會迷失係錄音之中；例子係紅綠燈身處錄音機嘅右邊，但係錄音之中就好似身處正中央。解決方法係可以係兩支咪高峰之間放置Stereo Microphone Array/Parallel Boundary Array 就可以產生逼真嘅Stereo Image。
參考：https://www.trackseventeen.com/mic_rigs.html
－Cardioid
NOS Cardioid 設置擁有最自然嘅Stereo Image，提供足夠嘅方向資訊同時兩邊聲道保持住連貫性，為聆聽者帶嚟合理同自然嘅環境包圍感。由於Cardioid 先天因素無法接收嚟自咪高峰後方嘅聲音，某啲聲音，例如係06:38 經過嘅輕鐵，聲音以比現實更快嘅速度消失，未能真實反映真實。
－Ambisonics (轉換為立體聲)
Ambisonics 錄音最大優勢係可以因應情況靈活改變其立體聲闊度同咪高峰極性，係轉換成Omni 嘅例子可以見到佢能夠生成比真實Omni 咪高峰更闊嘅Stereo Image，而Cardioid 嘅例子就展示咗佢能夠非常貼近真實Cardioid 咪高峰。只要少量嘅調整，係器材受限制嘅情況下呢種靈活性將會非常有用。
總結
雖然聽覺環境嘅形成，無論係城市或者大自然，都超出咗我哋嘅控制範圍，但用咩方法去記錄同捕捉就依賴錄音師嘅判斷。對於環境錄音，主題同採集嘅內容比起設備更加重要，而且無一種絕對正確嘅方法能夠用係所有地方；通過適當嘅決定，我哋將能夠製作出令人回味且引人入勝嘅錄音。